Argyle he has chosen a hundred o his men, He marched them out right early
He led them doon by the back o Dunkeld, to plunder the bonnie house o Airlie

The looked owre her window sae hie and oh but she grat sairly
To see Argyle and a his men come to plunder the bonnie house o Airlie

'Come doon, come doon Lady Ogilvie' he cried, 'come doon and kiss me fairly
Or I swear by the hilt o my good broad sword that I winna leave a stanin stane in Airlie'

'I winna come doon, ye cruel Argyle, I winna kiss ye fairly
I wadna kiss ye, fause Argyle tho ye sudna leave a stanin stane in Airlie'

'Come tell me where your dowry is hid, come tell it to me fairly
Come tell me where your dowry is hid or I winna leave a stanin stane in Airlie'

'I winna tell ye fause Argyle, I winna tell ye fairly
I winna tell ye where my dowry is hid tho ye sudna leave a stanin stane in Airlie'

They sought up and they sought down, I wat they sought it sairly
And it was below the bowling green they found the dowry of Airlie

'Gin my good lord had been at hame as he’s awa wi Charlie
There durstna a Campbell o a Argyle set a fit on the bonnie green o Airlie

Eleven bairns hae I born and the twelfth ne’er saw his daddy
But though I had gotten as mony again, thy sud a gang to fecht for Charlie

But since it’s so tak ye my hand and see ye lead me fairly
Ye lead me doon to yonder glen that I mayna see the burnin o Airlie

He’s taen her by the milkwhite hand but he didna lead her fairly
He led her up to the tap o the hill where she saw the burnin o Airlie

The smoke an the flames they rose sae hie the walls were blackened fairly
And the lady laid her doon on the green to die when she saw the burnin o Airlie.